ව්‍යාපාරික කටයුතු සඳහාත්, රැකියා කටයුතු සඳහාත්,
අධ්‍යාපනික කටයුතු සඳහාත්, ආගමික හෝ දේශාටන කටයුතු සඳහාත්, රෝග සඳහා ප්‍රතිකාර ලබා
ගැනීම සඳහාත්, විනෝදය පිණිසත්, තාවකාලික හෝ ස්ථිර පදිංචිය පිණිසත් වශයෙන් අපට
විදේශගත වීමට හේතුවන අවස්ථා බොහෝය.
හේතුව කුමක් වුවත් එක් දෙයක් ස්ථිරය. විදේශ රටකට
පා තැබූ මොහොතේ පටන් ඇත්තේ වියදමය. අදායම් ඉපැයීමක් සිදු කරන්නේනම් ඒ ව්‍යාපාරික
හෝ රැකියා කටයුතු සඳහා නික්ම යන්නෝ පමණෙකි. ඔවුන්ට වුව ද එහිදී ගජරාමෙට වියදමය.
විදේශ රටවලදී අපට හෝටල් සහ නිවාඩු නිකේතන වල නතර
වීමට සිදු වේ. කුලී රථ වල ගමන් කිරීමට සිදු වේ. සාගින්නේ සිටිය නොහැක. ආහාර
පානාදිය සඳහා වියදම් කල යුතු වේ. සාප්පු සංකීර්ණයකට ඇතුලු වුවහොත් ඉතින් ඉවරෙටම
ඉවරය.
පණිවිඩය පැහැදිලිය. විදේශ ගමනක් යනු මුල සිට අගටම
වියපැහැදම් සෑදෙන අවාසනාවන්ත වාසනාවකි.
මෙම වියදම් දැරිය යුතුමය. ඒ පිලිබඳ ආයේ දෙකක්
නැත. නමුත් අප අවධානය යොමු කල යුතු ගැටලුව එය නොවේ. මෙම වියදම් සිදු කල යුත්තේ
කුමන මාධ්‍යයක් හරහාද යන්නත් (සංචාරක චෙක්පත්, විදේශ මුදල් නෝට්ටු, ක්‍රෙඩිට්
කාඩ්) එම මාධ්‍යය භාවිතා කිරීමේදී අප සැලකිලිමත් විය යුත්තේ කුමන කරුණු පිළිබඳව ද
යන්නත් ය.
මුදල් නෝට්ටු නිතර අවශ්‍ය වෙතත්, විදේශ රටකදී අපට
දැරීමට සිදුවන වියදම සඳහා පහසුම, සරලතම ගෙවීම් මාධ්‍යයක් ලෙස ක්‍රෙඩිට් කාඩ්පත්
සඳහන් කල හැක. විදේශ විණිමය අනුපාතිකයන් ගැන වද වීමට අවශ්‍යතාවයක් නැත.
නිදසුනක් ලෙස ඔබ ඉන්දියාවට යන විට අතැති මුදල්
ලෙස ඉන්දියානු රුපියල් දස දහසක් රැගෙන යාමට අදහස් කලා යැයි සිතමු. එවිට ඔබ මෙහි
සිටින බලයලත් විදේශ මුදල් අලෙවිකරුවෙකුගෙන් මෙම මුදල මිලදී ගත යුතුය. ඔබ ඔහුට
ඉන්දියානු රුපියල් දස දහසකට සමාන රුපියල් ප්‍රමාණයක් ගෙවා (සමහරවිට ලංකා රුපියල් විසි
දහසක් පමණ) මෙම ඉන්දියානු රුපියල් ප්‍රමාණය ඉන්දියාවට රැගෙන යනු ඇත.
එවැනි අවස්ථාවකදී ඔබගේ අරමුණ වන්නේ හැකිතාක් අඩු
ලංකා රුපියල් ප්‍රමාණයකට හැකිතාක් වැඩි ඉන්දියානු රුපියල් ප්‍රමාණයක් ලබා ගැනීමයි.
ඔබට වාසි වන්නේ එවිටයි. විදේශ විනිමය අනුපාතික විමසිල්ලෙන් නිරීක්ෂණය කල හොත් ඔබට
මෙවැනි වාසි සහගත අවස්ථා විටින් විට උදා වෙයි.
මෙසේ පෙරුම් පුරා ලබා ගත් ඉන්දියානු රුපියල්
ඉන්දියාවේදී ඔබ වියදම් කරන්නේ ප්‍රවේශමෙනි. මන්ද යත් ඔබට ඇත්තේ මෙපමණකි. ඔබ අතේ
ලංකා රුපියල් තිබුනත් එහිදී ඒවායින් ඔබට වැඩක් නැත. ලංකා රුපියල්, ඉන්දියානු
රුපියල් වලට මාරු කර දීමට හැකි නියෝජිතයින් සොයා ගැනීම ද එහිදී අසීරු කාරණයකි.
මේ ඉන්දියානු මුදල් නෝට්ටු යමෙකුට ඔබගෙන්
පැහැරගැනීමට ද හැකියාවක් ඇත. පිහියක් පෙන්වා උදුරා ගෙන පලා ගිය පසු මොන දෙයියන්ට
කියන්න ද?
ඔබ ක්‍රෙඩිට්කාඩ්පත් හිමිකරුවෙකු නම් ඉහත ගැටළු
කිසිවකට මුහුණ පෑමට ඔබට අවශ්‍ය නැත. ඉන්දියානු රුපියල් මිලදී ගත යුතු නැත. එසේ
මිලදී ගැනීමට සුදුසු අවස්ථාවක් ගැන කරදර විය යුතු නැත. (ක්‍රෙඩිට් කාඩ්පත් මඟින්
විදේශයකදී ගෙවීම් කිරිම්දී ඔබට ලබා ගත හැකි වාසිදායකම විදේශ විනිමය අනුපාතිකය ස්වයංක්‍රීයව
ඔබට හිමිවනු ඇත) මුදල් නෝට්ටු නිසා ඔබගේ ජීවිතය අවදානයට ලක් කල යුතු වන්නේ ද නැත.
එහෙත් ක්‍රෙඩිට් කාඩ්පතක් තිබු පමණින් ඔබට
සුදුසුම ගෙවීම් මාධ්‍යය එයමද? ඒ සඳහා ඔබ විසින්ද අනුගමනය කල යුතු ක්‍රියා මාර්ගයන්
ද ඇත.
ඔබගේ බැංකුව අමතන්න. ඔබ විදේශගත වීමට බලාපොරොත්තු
වන බව ඔවුන්ට දැනුම් දෙන්න. එසේම ඔබ විදේශගත වන රට, කාල
වකවානුව සහ හදිසියකදී ඔබ ඇමතිය හැකි දුරකථන අංක ඔවුන් වෙත ලබා දෙන්න.
ඔබට ඔබගේ බැංකුව අමතිය හැකි දුරකථන
අංක කිහිපයක්ම ලබා ගන්න.
ඔබ විදේශගත වන රටට අදාලව ඔබගේ බැංකුව විසින් ඔබගේ
ක්‍රෙඩිට් කාඩ්පතට සම්බන්ධ කොට සැඟවුණු ගාස්තු
තිබිය හැක. සමහර ගාස්තු ඔබ සිදු කරන ගනුදෙනුවකට 2%ක් ආදී වශයෙන් නියම විය හැක. මේ
පිලිබඳව ඔබගේ බැංකුවෙන් විමසුම් කරන්න.
ප්‍රවේශමෙන් ඔබ අත්සන් යෙදු ක්‍රෙඩිට් කාඩ්පත් අයදුම්පත්‍රයේ ගිවිසුම් ප්‍රකාශනය යලිත් කියවා
බලන්න. සැකමුසු තැන් ඇත්නම් ඔබගේ බැංකුව සමඟ සාකච්ජා කරන්න.
විදේශයකදී ඔබ ක්‍රෙඩිට් කාඩ්පතින් ගනුදෙනුකරන
අවස්ථාවකදී එහි මිල දර්ශකය ඇමරිකානු ඩොලර් වලින් සඳහන් කර
තිබේ නම් ප්‍රවේශම් වන්න. සමහර විට ඔවුන් ඔබගේ කාඩ්පත භාරගෙන ගනුදෙනුව සිදු
කරන්නේ ඇමරිකානු ඩොලර් වලින් නොවේ. එම රටේ දේශීය මුදලෙනි. එහිදී ද යම් ප්‍රමාණයක
ලාභයක් ඔවුන් උපයා ගනිති.
ඔබ ළඟ නිරන්තරයෙන් ඔබගේ ගමන්
බලපත්‍රය ලඟ තබා ගන්න. memory chip නොමැති magnetic stripe පමණක් ඇති ක්‍රෙඩිට් කාඩ්පත් සමහර විට ඔබ
භාවිතා කරනු ඇත. මෙවන් කාඩ්පත් ඇතැම් විදේශ වෙළෙඳුන් ප්‍රතික්ෂේප කරති. එහෙත් ගමන්
බලපත්‍රය ඉදිරිපත් කිරීමෙන් ඔවුන්ගේ සැකය දුරු කල හැක.
No comments:
Post a Comment